Кондак 1
Избранный Богом на
служение первосвященническое, святый славне пророче Аароне, прославяюще
возвеличившаго тя Господа, тебе, яко первому архиерею Всевышняго, похвалныя
песни возсылаем, ты же, предстояй ныне пред лицем Божиим, Емуже жертвы и
всесожжения приносил еси, поминай нас у престола Его, да зовем Ти:
Радуйся святый
пророче Аароне, первосвященниче Господень и первый архиерее Бога Всевышняго.
Икос 1
Ангелов Творец и
властей Владыка в деснице Своей содержаяй вся народы и промыслительно ими
управляяй, егда изволи извести народ Свой Израиля из рабства египетскаго, избра
тя славне Аароне чрез раба Своего Моисея в первосвященники Себе, дабы
предстроять ти пред Ним во святилище и возносити Ему жертвы и всесожжения,
молитвы и прошения о людех. Мы же восхваляя Бога за сие, приносим ти таковая:
Радуйся, народа
богоизбранного отрасле пречестная.
Радуйся, родителей
благочестивых чадо благословенное.
Радуйся, великому
Моисею сродник явивыйся.
Радуйся, споборник и
соратник в нелегком деле народоправления тому бывый.
Радуйся, святых
праотцев ветве многоплодная.
Радуйся, колена
Левина прозябение священное.
Радуйся, святый
пророче Аароне, первосвященниче Господень и первый архиерее Бога Всевышняго.
Кондак 2
Егда по велению Божию
возвратися Моисей во Египет, дабы извести народ избранный в землю обетованную,
юже Господь дати праотцем обещася, ты же, пророче Аароне, сретил его, и
предвкушая скорое избавление от рабства египетскаго, в радости вопиял
Всевышнему: Аллилуия!
Икос 2
Егда же нечестивый
фараон повеле умервщляти младенцы мужеска полу, дабы истребити народ
израильский, ты, славне Аароне, во младенчестве силою Божией сохранен был еси и
в житии твоем тяготу и труд рабский с соплеменники твоими разделяя, скорбя и
моляся о народе твоем. Сия ведуще, мы недостойнии воспеваем ти таковая:
Радуйся, гибели во
младенчестве от слуг фараоновых избежавый.
Радуйся, слою Божией
от неистовства фараона сохраненный.
Радуйся, скорби и
тяготы народа твоего разделивый.
Радуйся, с люди
твоими много лишений претерпевый.
Радуйся, сретением со
сродником твоим Моисеем обрадованный светло.
Радуйся, извещением о
грядущем избавлении от рабства египетскаго возвеселивыйся радостно.
Радуйся, святый
пророче Аароне, первосвященниче Господень и первый архиерее Бога Всевышняго.
Кондак 3
Яви Господь пред лице
фараона Моисея яко Бога, тебе же славне Аароне яко пророка, во еже дивная и
страшная знамения силою Его сотворити. Мы же чудящеся промышлению Божию о тебе,
вопием Создателю: Аллилуия!
Икос 3
Повинуяся смиренно
промыслу Божию, на тебе явленному, дивне пророче Аароне, всюду следовал еси за
сродником твоим великим Моисеем и был еси по слову Господню устами его, волю
Божию и определения Его возвещая. Сего ради восхваляем тя песньми таковыми:
Радуйся, всего себе в
руце Божии предавый.
Радуйся, право во
оправданиях Господних ходивый.
Радуйся, яко яви тя
Господь пред лицем фараоновым яко пророка вместо Моисея.
Радуйся,
сладкогласными устами Моисеевыми по повелению Божию бывый.
Радуйся, волю Божию,
оправдания и судьбы Его возвестивый.
Радуйся, нечестие и
жетокосердие фараоново обличивый.
Радуйся, святый
пророче Аароне, первосвященниче Господень и первый архиерее Бога Всевышняго.
Кондак 4
По повелению Божию
пришел еси, славне Аароне, со сродником твоим великим Моисеем к фараону, волю
Господню тому изъявляя, да отпустит народ израильский во еже принести жертву
Господеви в пустынии. Он же неразумен и жестокосерден сый не внял повелению
Всевышеяго и не воспел Ему: Аллилуия!
Икос 4
Повеле ти пророче
Аароне великий Моисей во уверение и истинность словес ваших, бросить жезл твой
пред фараона, да будет змей, жрецы же языческия силою бесовскою сотвориша тако.
Но жезл твой, змием ставший, поглотил змия идолопоклонников, да вразумятся
неверные и прославят Бога всемогущего, сотворшаго небо и землю, тебе же
возглаголют тако:
Радуйся, даром чудес
от Господа обогащенный.
Радуйся, силою
знамений от Всевышняго наделенный.
Радуйся, жезл твой,
яко знамение архиерейской благодати на тебе явитися хотящей бывый.
Радуйся, яко жезл
твой, символом духовной власти над народом твоим прообразно служивый .
Радуйся, яко жезлом
сим многая и дивная чудеса и знамения сотворивый.
Радуйся, имже на
многое время верно упасл еси люди народа твоего Израиля.
Радуйся, святый
пророче Аароне, первосвященниче Господень и первый архиерее Бога Всевышняго.
Кондак 5
Отяготи Бог сердце
безумнаго и гордаго фараона и рабов его, дабы явить всю силу знамений чудес над
ними, да людие израильстии возвестят сыновом своим из рода в род, яже яви
Господь во Египте велия и страшная и да уверуют, еже Госопдь есть Бог Един,
Емуже вся силы небесныя со страхом вопиют: Аллилуия!
Икос 5
Восхоте Господь явити
силу свою над нечестивым фараоном, повеле тебе, пророче Аароне чрез раба Своего
Моисея прострети жезл твой на воды – и бысть воды кровь; прострети жезл твой на
реки – и воскипе земля жабами; прострети жезл твой на персть земную – и явишася
скнипы на человецех и скотех по всей земли египетстей. Мы же ужасаяся и
смиренно преклоняя главы своя пред величием Божиим, тебе, славне Аароне,
глаголем сице:
Радуйся, многия
чудеса от Господа совершивый.
Радуйся, велия и
страшная знамения силою Его сотворивый.
Радуйся, свойства
стихий по повелению Божию изменяяй.
Радуйся, суды и
повеления Господни исполняяй.
Радуйся, во гресех
пребывающих словесы твоими обличаяй.
Радуйся, в
жестокосердии и беззакониях коснеющим наказания от Бога посылаяй.
Радуйся, святый
пророче Аароне, первосвященниче Господень и первый архиерее Бога Всевышняго.
Кондак 6
Изводя избранный
народ Свой из рабства египетскаго, повеле Господь сынам израилевым заклати
пасхальнаго агнца, и кровию его помазати косяки дверей, да ангел смерти, идущий
от Бога погубити первородное египетское, мимо идет домов израильских. Да людие
от смерти избавленнии возопиют Богу: Аллилуия!
Икос 6
Избави Господь люди
Своя от смерти кровию агнца и изведе я из рабства египетскаго. Мы же кровию
Агнца Божия от вечныя смерти избавльшеся и изведенны Им от рабства греховнаго,
восхваляем Христа Бога нашего, тебе же пророче Аароне вопием тако:
Радуйся, вся
повеления Божия усердно исполнивый.
Радуйся, уставы
Господни народу израильскому изъяснявый.
Радуйся, пасхи
богоустановленной благоговейный совершителю.
Радуйся, радостной
вести о избавлении людей твоих от смерти и рабства египетскаго возвестителю.
Радуйся, яко кровь
агнца пасхальнаго прообразом Крови Единороднаго Сына Божия на Кресте за ны
пролитой явися.
Радуйся, яко исходом
народа твоего из Египта наш исход Христом Богом из рабства греху и смерти провозвестися.
Радуйся, святый
пророче Аароне, первосвященниче Господень и первый архиерее Бога Всевышняго.
Кондак 7
Радости и веселия
исполнися сердце твое, славне Аароне, изшедшу ти с народом твоим из земли
египетсия, егда по велению Божию простершу Моисею жезл свой, море Чермное
разступися и сынове израилевы проидоша по морю аки по суху, столпом облачным и
огненным руководими. Мы же прославляюще величия Божия, в веселии поем Ему:
Аллилуия!
Икос 7
Егда же паки по
велению Божию простре великий Моисей жезл свой на море и абие сомкнуся воды,
потопи египетския всадники и тристаты. Людие же спасение улучивше, воспеваху
Бога Всевышняго. Мы же, славне пророче Аароне, тебе приносим сицевая:
Радуйся, по морю
Чермному аки по суху прошедый.
Радуйся, шествием сим
наше Крещение во имя Отца, и Сына, и Святаго Духа прообразовавый.
Радуйся, от гибели
греховной нас молитвами твоими спасаяй.
Радуйся, от
потопления в волнах беззаконий нас твоими ходатайствы ограждаяй.
Радуйся, нам земным
странникам заповедьми Божиими, аки светом из столпа огненнаго путь указуяй.
Радуйся, жажду
духовную исполнением закона Господняго, яко росою из облака в нас утоляяй.
Радуйся, святый
пророче Аароне, первосвященниче Господень и первый архиерее Бога Всевышняго.
Кондак 8
Многия чудеса и знамения
яви Господь людем израильским в пустыне, изводя воду из камене, манну с небесе
посылая. Ты же вся сия видев, славне пророче Аароне, с благодарным сердцем
взывал Богу: Аллилуия!
Икос 8
Егда же нападе Амалик
на Израиля в Рефедиме, тогда Моисей воздев руки, ко Господу молитву вознося,
тогда одолеваше Израиль Амалика, егда же ослабеваху руце моисеовы, тогда
амаликитяне одолеваху сынов израилевых. Ты же видя сие, пророче Аароне, вкупе с
Ором поддерживал руки моисеовы, дондеже зайде солнце и победи Израиль Амалика.
За сие благодоряще Бога, глаголем тебе сицевая:
Радуйся, помощниче и
сомолитвенниче великому Моисею явивыйся.
Радуйся, споборниче
народу твоему на враги бывый.
Радуйся, воином во
бранех правых помогаяй.
Радуйся, врагов
Церкви Христовой и супостатов отечества нашего одолеваяй.
Радуйся, в руках
моисеовых к небу воздетых Крест Господень нам прообразися.
Радуйся, имже
мысленный Амалик – диавол победися.
Радуйся, святый
пророче Аароне, первосвященниче Господень и первый архиерее Бога Всевышняго.
Кондак 9
Многажды искушаше
Израиль Господа своего в пустыни ропотом и непослушанием, за сия посла Бог
сыновом израилевым различныя кары, послежди наказа их сорокалетним странствием
в пустыни, да никтоже из изшедших из Египта внидет в землю обетованную, токмо
Иисус Навин и Халев. Да вразумятся людие и познают Бога Всевышняго, поя Ему:
Аллилуия!
Икос 9
Витийством лукавым
одержимый, худое замысли пред Богом Израиль, егда взыде Моисей на гору Синайскую,
постився дней четыредесять, да восприимет скрижали Завета, перстом Божиим
начертанные. Людие же лукавии приступиша к тебе, славне Аароне, требуя
сотворити им образ Бога, из земли египетския их выведшаго. Ты же видя, яко
ропот и негодование возраташе, попусти по начинанию сердец их (не сам яко во
идолопоклонство впадая) повеле принести злато и сотвори им тельца златого, сам
же об окаменении и жестосердии их скорбя. Сего ради вопием ти тако:
Радуйся, скорби от
народа жестоковыйнаго претерпевый.
Радуйся, покаяние за
народ твой и с народом твоим Богу приносивый.
Радуйся, заповедей
Божиих верный исполнителю.
Радуйся, суббот и
постановлений Господних ревностный чтителю.
Радуйся, хулителей и
неисполняющих заповеди Господни наказателю.
Радуйся, пренебрегающих
повелениями и установлениями Божиими отмстителю.
Радуйся, святый
пророче Аароне, первосвященниче Господень и первый архиерее Бога Всевышняго.
Кондак 10
Восхоте Господь
установити священство в народе Своем Израиля и учредити богослужения, избра тя,
славне пророче Аароне в первосвященники себе, сынов же и соплеменников твоих во
иереи и левиты, дабы служили Ему в скинии день и нощь и непрестанно прославляли
Его победною песнию: Аллилуия!
Икос 10
Возливаше великий
Моисей по повелению Господню елей на главу твою, Аароне, в чин
первосвященнический тя возводя и облече в ризы архиерейския, дабы предстоять ти
пред жертвенником Божиим и возносити жертвы и всесожжения пред лице Его за
народ израильский. Мы же радуяся о сем, глаголем тебе сицевая:
Радуйся, чрез
возлиянием елея священнаго на великое служение архиерейское Богом поставленный.
Радуйся, чрез
помазание сие Духом Святым преисполнивыйся.
Радуйся, в ризы
светлы и позлащенны великим Моисеем облеченный.
Радуйся, в скинии
жертвы и возлияния пред Бога возносивый.
Радуйся, фимиам
благовонный в воню благоухания духовнаго пред Создателем воскурявый.
Радуйся, единожде в
лето во Святая Святых пред лице Божие входивый.
Радуйся, святый
пророче Аароне, первосвященниче Господень и первый архиерее Бога Всевышняго.
Кондак 11
Избран быв от всех
сынов израилевых в сан архиерея яко достойный, мудростию от Бога наделенный и
Духом Святым просвещенный, славне Аароне. Мы же восхваляюще Господа за дивное
избрание твое, вопием Ему: Аллилуия.
Икос 11
Пресветлым светилом
возсиял еси Аароне в народе твоем, светом добродетелей сияя и службы в скинии
пред Ковчегом Завета совершая. Жезлом твоим прозябшим увери Бог непокорныя
люди, яко священство твое от Бога установлено есть тебе и сынам твоим колена
Левина в род и род. Сего ради приносим тебе таковая:
Радуйся,
родоначальник священства израильскаго бывый.
Радуйся, от всех
сынов израилевых на великое архиерейское служение Всевышним избранный.
Радуйся, на высоту
первосвященства аки светильник пресветел Богом поставленный.
Радуйся, яко жезлом
твоим Господь священство колену Левину утверди.
Радуйся, яко жезл
твой прозябший Пресвятую Деву Марию нам прообрази из Нея же цвет Христос
произыде.
Радуйся, яко жезл
твой иже цвет и плоды изведе, неплодящую Церковь из языков прообразова, иже
плод свой Богу принесе во время свое.
Радуйся, святый
пророче Аароне, первосвященниче Господень и первый архиерее Бога Всевышняго.
Кондак 12
Егда прииде час
отшествия твоего после многих трудов и странствий твоих, славне пророче Аароне,
тогда возшел еси на гору Ор и тамо предал дух твой Господу. Послежде был со
всеми праведными изведен Христом Спасителем в горния обители, идеже ныне
предстоиши лицу Божию и непрестанно со всеми святыми вопиеши Ему: Аллилуия.
Икос 12
Аще и не даде тебе,
славне Аароне, Господь узрети землю обетованную, но ныне райския обители
наследова, идеже предстоиши Богу и молишися о всех вопиющих тебе таковая:
Радуйся, молитвенниче
о нас пред Богом неусыпный.
Радуйся, ходатаю о
нас пред престолом Его преславный.
Радуйся, в скинии
гадательно, прообразовательно, ныне же явственно лице Божие зриши.
Радуйся, с небесными
силы и всеми святыми хвалу Богу воспеваеши.
Радуйся, архиереев
честных похвало и в трудном их пастырском служении помощниче.
Радуйся, священного и
церковнаго чина преславное укращение.
Радуйся, святый
пророче Аароне, первосвященниче Господень и первый архиерее Бога Всевышняго.
Кондак 13
О преславный,
пречудный пророче Божий и великий архиерее Аароне! Приими ныне малое приносимое
от недостойных устен тебе моление. И яко имеяй дерзновение ко Всевышнему, не
премолчи за ны ко Господу. Да твоими молитвами и ходатайствы избавлени будем
гнева Божия и унаследуем Царствие Небесное, идеже с тобою и всеми святыми
воспоим Святую Троицу победною песнею: Аллилуия, Аллилуия, Аллилуия!
Этот Кондак читается
трижды, затем Икос 1-й и Кондак 1-й
Икос 1
Ангелов Творец и
властей Владыка в деснице Своей содержаяй вся народы и промыслительно ими
управляяй, егда изволи извести народ Свой Израиля из рабства египетскаго, избра
тя славне Аароне чрез раба Своего Моисея в первосвященники Себе, дабы
предстроять ти пред Ним во святилище и возносити Ему жертвы и всесожжения,
молитвы и прошения о людех. Мы же восхваляя Бога за сие, приносим ти таковая:
Радуйся, народа
богоизбранного отрасле пречестная.
Радуйся, родителей
благочестивых чадо благословенное.
Радуйся, великому
Моисею сродник явивыйся.
Радуйся, споборник и
соратник в нелегком деле народоправления тому бывый.
Радуйся, святых
праотцев ветве многоплодная.
Радуйся, колена
Левина прозябение священное.
Радуйся, святый
пророче Аароне, первосвященниче Господень и первый архиерее Бога Всевышняго.
Кондак 1
Избранный Богом на
служение первосвященническое, святый славне пророче Аароне, прославяюще возвеличившаго
тя Господа, тебе, яко первому архиерею Всевышняго, похвалныя песни возсылаем,
ты же, предстояй ныне пред лицем Божиим, Емуже жертвы и всесожжения приносил
еси, поминай нас у престола Его, да зовем Ти:
Радуйся святый
пророче Аароне, первосвященниче Господень и первый архиерее Бога Всевышняго.
Молитва
О, святый славный
пророче и первосвященниче Божий Аароне! Архиерейским служением своим
первосвященство великаго Архиерея Христа Сына Божия прообразовавый и жертвами
непорочными Его жертву на крестном алтаре за весь мир провозвестивый. Ныне мы
искупленные Его честною Кровию восхваляем тя и просим. Твоим предстательством у
престола Всевышнего испроси нам вся потребная в жизни сей и душам нашим
полезная. Пастырям нашим испроси мудрости и ревноси по Бозе, попечения о
словесных овцах, воинству нашему победу на враги даруй, младенцы возрасти, юных
во благочестии и целомудрии воспитай, супругам согласие и мир ниспошли, старых
поддержи, немощных исцели и во вражде сущия умири. Всем же нам подай в
Православной вере утверждения и мирную непостыдную кончину христианскую и
Святых Таин причастну. Да благочестно пожив веце сем, сподобимся достигнути
вечнаго Небеснаго Царствия идеже ты ныне пребывеши со сродником твоим великим
Моисеем и сродницей твоей святой Мариамною и тамо со всеми святыми прославлять
Святую Троицу во веки веков. Аминь.
Тропарь, глас 2:
Пророка Твоего Аарона
память, Господи, празднующе, /тем Тя молим: //спаси души наша.
Кондак, глас 4:
Просветившееся Духом
чистое твое сердце / пророчества бысть светлейшаго приятелище, /зриши бо яко
настоящая далече сущая, /сего ради тя почитаем, /пророче блаженне Аароне,
славне.
Величание:
Величаем тя, /пророче
Божий Аароне, /и чтим святую память твою /ты бо молиши за нас /Христа Бога
нашего.
Δεν υπάρχουν σχόλια:
Δημοσίευση σχολίου